ಬೆಚ್ಚನಾ ಮನೆಯಿರಲು, ವೆಚ್ಚಕ್ಕೆ ಹೊನ್ನಿರಲು ಸ್ವರ್ಗಕ್ಕೆ ಕಿಚ್ಚು ಹಚ್ಚೆಂದು ಕವಿ ಸರ್ವಜ್ಞನೇ ಹೇಳಿದ್ದಾನೆ. ಮಳೆ, ಗಾಳಿ, ಬಿಸಿಲು ಹಾಗೂ ಚಳಿಯಿಂದ ನಮಗೆ ರಕ್ಷಣೆ ಒದಗಿಸುವ ಬೆಚ್ಚನೆಯ ಮನೆ ಎಂದರೇ ಒಂದು ಸುಖಾನುಭವ.

ಇನ್ನು ಚಳಿಗಾಲ ಬಂದೆಂದರೆ ರತ್ನಗಂಬಳಿ, ದಿಂಬು ಹಾಗೂ ಉಣ್ಣೆಯ ಹಲವು ಆರಾಯದಾಯಕ ಸಾಧನಗಳನ್ನು ಬಳಸಿ ಮನೆಯನ್ನು ಸಿಂಗರಿಸುವ ಜತೆಗೆ, ಚಳಿಗಾಲವನ್ನು ಸುಖದಿಂದ ಕಳೆಯುವ ಹವಣಿಕೆ ಪ್ರತಿಯೊಬ್ಬರಲ್ಲೂ ಇರುತ್ತದೆ.

ಕೆಲವು ಪ್ರದೇಶಗಳಲ್ಲಿ ವಿಪರೀತ ಚಳಿ ಇರುತ್ತದೆ. ಆಗ ಟೈಲ್ಸ್ ಹಾಕಿದ ನೆಲದ ಮೇಲೆ ಕಾಲಿಡಲೂ ಹಿಂಜರಿಕೆ. ಹಾಸಿಗೆ ಬಿಟ್ಟು ಮೇಲೇಳಲೂ ಬೇಸರಪಟ್ಟುಕೊಂಡು ಮತ್ತೆ ಮತ್ತೆ ಹೊದಿಕೆಯೊಳಗೆ ತೂರಿಕೊಳ್ಳುತ್ತೇವೆ. ಹಾಗಂತ ಎಷ್ಟು ಹೊತ್ತು ಮಲಗಿರಲು ಸಾಧ್ಯ? ಎದ್ದು ಚಟುವಟಿಕೆ ಆರಂಭಿಸಲೇ ಬೇಕಲ್ಲವೇ? ಒಂದಷ್ಟು ಉಪಕರಣಗಳು ಮನೆಯನ್ನು ಬೆಚ್ಚಗಿರಿಸಿ, ನಮ್ಮನ್ನು ಚಳಿಯಿಂದ ಕಾಪಾಡಲೆಂದೇ ಮಾರುಕಟ್ಟೆಗೆ ಲಗ್ಗೆಯಿಟ್ಟಿವೆ. ಅವುಗಳನ್ನು ಒಂದೊಂದಾಗಿ ನೋಡೋಣ.

ರತ್ನಗಂಬಳಿ ಹಾಸು
ಮನೆಯ ವಿಶಾಲವಾದ ಹಾಲ್ ನಲ್ಲಿ ಬಣ್ಣ ಬಣ್ಣದ ನೆಲ ಹಾಸು ಹಾಕುವುದನ್ನು ನೀವು ನೋಡಿರಬಹುದು. ಬಾಗಿಲಿನಲ್ಲೇ ಚಿಕ್ಕ ಗಾತ್ರದ ನೆಲಹಾಸು (ಮ್ಯಾಟ್) ಗಳಿರುತ್ತವೆ. ಮನೆಯ ಒಳಗೆ ಬರುವಾಗ ಒದ್ದೆ ಕಾಲು ಅಥವಾ ಧೂಳು ಒರೆಸಿಕೊಂಡು ಬರಲಿ ಎಂಬ ಉದ್ದೇಶದಿಂದ ಅವುಗಳನ್ನು ಹಾಕಿರುತ್ತೇವೆ. ಆದರೆ, ಹಾಲ್ ನಲ್ಲಿ ಸೋಫಾದ ಮೇಲೆ ಅಥವಾ ನೆಲದ ಮೇಲೆ ಕುಳಿತು ವಿಶ್ರಮಿಸುವ ಜಾಗದಲ್ಲಿ ಉತ್ತಮ ಗುಣಮಟ್ಟದ ರತ್ನಗಂಬಳಿಯನ್ನೇ ನೆಲಹಾಸು ರೂಪದಲ್ಲಿ ಬಳಸುವುದು ವಾಡಿಕೆ. ಇದರಿಂದ  ಮನೆಯ ಅಂದವೂ ಹೆಚ್ಚುವ ಜತೆಗೆ, ಮಕ್ಕಳು, ವೃದ್ಧರು ಕೂಡ ಆತಂಕವಿಲ್ಲದೆ ಓಡಾಡಬಹುದಾಗಿದೆ.

ಹೊಂದಾಣಿಕೆಯ ಹಾಸಿಗೆ
ಮನೆಯ ಹಾಲ್ ಗಲೀಜಾಗದಂತೆ ಹಾಗೂ ಟೈಲ್ಸ್ ಗಳ ಥಂಡಿ ಕಾಲಿಗೆ ತಾಗದಂತೆ ರತ್ನಗಂಬಳಿ ಬಳಸುವರು. ಮಾರುಕಟ್ಟೆಯಲ್ಲಿ ಕಡಿಮೆಗೆ ಸಿಕ್ಕಿತೆಂದು ಯಾವ್ಯಾವುದೋ ನೆಲಹಾಸುಗಳನ್ನು ತಂದು ಹಾಕಿದರೆ ಅದು ಮನೆಯ ಅಂದಗೆಡಿಸುತ್ತದೆ. ಮನೆಯ ಗೋಡೆ, ನೆಲದ ಕಲ್ಲುಹಾಸು, ಸೋಫಾ ಅಥವಾ ಇತರ ಪೀಠೋಪಕರಣಗಳಿಗೆ ಒಪ್ಪುವಂತಹ ರತ್ನಗಂಬಳಿಗಳನ್ನು ಆಯ್ಕೆ ಮಾಡಬೇಕು. ಊಟದ ಮೇಜು, ಕುಳಿತುಕೊಳ್ಳುವ ಕುರ್ಚಿಗಳು, ಸೋಫಾಗಳಿಗೂ ಋತುಮಾನಕ್ಕೆ ತಕ್ಕಂತೆ ಹಾಸುಗಳನ್ನು ಬದಲಿಸಿದರೆ ಮನೆಯ ಅಂದವೂ ಹೆಚ್ಚುತ್ತದೆ, ಕಾಲಮಾನಕ್ಕೆ ತಕ್ಕಂತೆ ಆರಾಮದಾಯಕ ಅನುಭವವನ್ನೂ ನೀಡುತ್ತದೆ.

ಹಿತಕರ ದಿಂಬುಗಳ ಬಳಕೆ
ಮೈಮೇಲೆ ಸ್ವೆಟರ್, ಕಾಲುಚೀಲ ಇತ್ಯಾದಿಗಳನ್ನು ಧರಿಸಿ ಚಳಿಗಾಲದಲ್ಲಿ ಬೆಚ್ಚಗಿರಲು ಬಯಸುವ ನಾವು ಸೋಫಾ, ಕುರ್ಚಿಗಳ ಮೇಲೆ ಅಥವಾ ಕಾಟಿನ ಮೇಲೆ ಕುಳಿತುಕೊಳ್ಳುವಾಗ ಒರಗಿಕೊಳ್ಳಲು ಮೆತ್ತನೆಯ ದಿಂಬುಗಳನ್ನೂ ಬಳಸುವುದು ಸೂಕ್ತ. ಇದರಿಂದ ಬೆನ್ನಿಗೆ ಹೆಚ್ಚು ಆರಾಮದಾಯಕ ಅನುಭವ ಆಗುತ್ತದೆ. ದಿಂಬಿನ ಹೊದಿಕೆಗಳು ಮೆತ್ತಗಿರಬೇಕು. ಬಣ್ಣಗಳು ಆಕರ್ಷಕವಾಗಿರಬೇಕು. ಎಣ್ಣೆ, ಕೊಳೆ ಮೆತ್ತಿಕೊಂಡಿರಬಾರದು. ಅವುಗಳನ್ನು ಆಗಾಗ ತೊಳೆದು, ಬಿಸಿಲಲ್ಲಿ ಒಣಗಿಸಿದರೆ ಹಿತಕರವಾಗಿರುತ್ತವೆ. ಆಗ ದೀರ್ಘಾವಧಿ ಬಳಸಿದರೂ ಯಾವುದೇ ತೊಂದರೆ ಇರುವುದಿಲ್ಲ.

ಸಸ್ಯಗಳಿಗೂ ಜಾಗವಿರಲಿ
ಚಳಿಗಾಲ ಎಂದಾಕ್ಷಣ ಮನೆಯ ಎಲ್ಲ ಕಿಟಕಿ-ಬಾಗಿಲುಗಳನ್ನು ನಾವು ಮುಚ್ಚಿಬಿಡುತ್ತೇವೆ. ಮನೆಯೊಳಗೂ ಮೆತ್ತನೆಯ ಹಾಗೂ ಬೆಚ್ಚನೆಯ ವಾತಾವರಣ ಸೃಷ್ಟಿಸಿ ಎಲ್ಲವೂ ಅಂದವಾಗಿದೆ ಎಂದು ಭಾವಿಸುತ್ತೇವೆ, ಅದಕ್ಕೆ ಪೂರಕವಾಗಿ ಮನೆಯ ಮೂಲೆಯಲ್ಲಿ, ಗಾಳಿ-ಬೆಳಕು ಆಡುವಂಥ ಸ್ಥಳದಲ್ಲಿ ಗಿಡಗಳನ್ನಿಟ್ಟು ಜೋಪಾನ ಮಾಡುವುದು ಒಳ್ಳೆಯದು. ಇದರಿಂದ ಮನೆಯ ವಾತಾವರಣ ಆಮ್ಲಜನಕದಿಂದ ಸಮೃದ್ಧವಾಗಿರುತ್ತದೆ. ಹಸುರು ಬಣ್ಣದಿಂದಾಗಿ ಆಹ್ಲಾದವೂ ಉಂಟಾಗುತ್ತದೆ.

ಪದರುಳ್ಳ ಕಂಬಳಿಗಳ ಬಳಕೆ
ದಕ್ಷಿಣ ಭಾರತದಲ್ಲಿ ಪದರುಗಳುಳ್ಳ ಹೊದಿಕೆಗಳನ್ನು ಮಾಡುವ ರೂಢಿ ಬಹಳ ಕಡಿಮೆ. ನಾವು ಬಹುತೇಕ ಸೊಲಲಾಪುರ ಅಥವಾ ಸ್ಥಳೀಯವಾಗಿ ತಯಾರಿಸಿದ ಏಕ ಪದರಿನ ಹಾಸಿಗೆ, ಹೊದಿಕೆ ಬಳಕೆ ಮಾಡುತ್ತೆವೆ. ಆದರೆ, ಚಳಿಗಾಲಕ್ಕೆ ಅನುಕೂಲವಾಗುವಂತೆ ಉತ್ತರ ಭಾರತೀಯರು ಬಳಸುವ ಪದರುಳ್ಳ ಕಂಬಳಿಗಳನ್ನು ಬೆಚ್ಚನೆಯ ಅನುಭವ ನೀಡುವ ಜತೆಗೆ ನಿದ್ರೆಯ ವೇಳೆ ಯಾವುದೋ ತೊಂದರೆ ಆಗದಂತೆ ತಡೆಯುತ್ತವೆ.

ಹೊದಿಕೆಗಳು ಸ್ವಚ್ಛವಾಗಿರಲಿ
ಮನೆಯಲ್ಲಿ ಬಳಸುವ ವಸ್ತುಗಳು ಸಾಧ್ಯವಾದಷ್ಟೂ ಧೂಳಿನಿಂದ ಮುಕ್ತವಾಗಿರುವಂತೆ ಎಚ್ಚರಿಕೆ ವಹಿಸುವುದು ಅಗತ್ಯ. ಅದರಲ್ಲೂ ಮುಖ್ಯವಾಗಿ ನಮ್ಮ ಹಾಸಿಗೆ, ಹೊದಿಕೆ, ತಲೆದಿಂಬು, ಸೋಫಾದ ಮೇಲುಹಾಸು ಇತ್ಯಾದಿಗಳನ್ನು ಆದಷ್ಠೂ ಧೂಳುಮುಕ್ತವಾಗಿರಿಸಿ. ಬಿಸಿಲಿದ್ದಾಗ ಸ್ವಚ್ಛಗೊಳಿಸಿ ಚೆನ್ನಾಗಿ ಒಣಗಿಸಬೇಕು. ಇಲ್ಲದಿದ್ದರೆ ಚಳಿಯ ವಾತಾವರಣದಲ್ಲಿ ನಿಮಗೆ ಅಲರ್ಜಿ, ಶೀತ, ಒಣಕೆಮ್ಮು ಇತ್ಯಾದಿಗಳು ಕಾಡುತ್ತವೆ. ಧೂಳು ದೇಹಕ್ಕೆ ಸೇರಿದರೆ ಹಲವು ಬಗೆಯ ಅನಾರೋಗ್ಯಕ್ಕೆ ಕಾರಣವಾಗುತ್ತದೆ. ಮನೆಯ ಇತರ ಕಡೆಗಳಲ್ಲೂ ಧೂಳು, ಬಲೆ ಇಲ್ಲದಂತೆ ಸ್ವಚ್ಛವಾಗಿಟ್ಟುಕೊಳ್ಳುವುದು ಮುಖ್ಯ.