ಕೆಲವರಿಗೆ ಎಲ್ಲಾದರೂ ಪ್ರಯಾಣಕ್ಕೆ ಹೊರಟರೆ ಸಾಕು ವಾಂತಿ,ತಲೆಸುತ್ತು ಇದ್ದಕ್ಕಿದ್ದಂತೆ ಆರಂಭವಾಗಿಬಿಡುತ್ತದೆ. ಆ ಪ್ರವಾಸ ಚಿಕ್ಕದಿರಲಿ, ದೊಡ್ಡದಿರಲಿ, ಈ ಗೋಳು ತಪ್ಪಿದ್ದಲ್ಲ. ಈ ಸಮಸ್ಯೆಯಿಂದಾಗಿ ಹೊರಗೆ ಸುತ್ತುವ ಬಯಕೆಯನ್ನು ಅದುಮಿಟ್ಟುಕೊಳ್ಳುವವರೇ ಹೆಚ್ಚು.
ಪ್ರಯಾಣದ ಸಂದರ್ಭದಲ್ಲಿ ಉಂಟಾಗುವ ಇಂಥ ಕಿರಿಕಿರಿಗಳಿಗೆ ಟ್ರಾವೆಲ್ ಸಿಕ್ನೆಸ್ ಅನ್ನುತ್ತಾರೆ.
ಕಣ್ಣಿನ ಮೂಲಕ ಗ್ರಹಿಸಿದ ದೃಶ್ಯಗಳನ್ನು ಮಿದುಳು ಸಂಸ್ಕರಿಸಿ ಕಿವಿಗೂ ರವಾನಿಸುತ್ತದೆ. ಈ ಸಂದೇಶಗಳಿಗೆ ದೇಹ ಸಕಾರಾತ್ಮಕವಾಗಿ ಸ್ಪಂದಿಸದಿದ್ದಾಗ ತಲೆನೋವು, ವಾಂತಿ, ತಲೆ ಸುತ್ತುವಿಕೆ ಕಾಣಿಸಿಕೊಳ್ಳುತ್ತದೆ.
ಟ್ರಾವೆಲ್ ಸಿಕ್ನೆಸ್ ನಿಂದ ಪಾರಾಗಲು ಕೆಲವು ಟಿಪ್ಸ್ ಇಲ್ಲಿವೆ.
- ಬಸ್, ಕಾರಿನಲ್ಲಿ ಪ್ರಯಾಣಿಸುವ ಸಂದರ್ಭ ಬಂದಾಗ ಹಿಂದಿನ ಸೀಟಿನ ಬದಲು ಮುಂದಿನ ಸೀಟನ್ನೇ ಆಯ್ಕೆಮಾಡಿಕೊಳ್ಳಿ. ಇದರಿಂದ ತಾಜಾ ಗಾಳಿ, ಬೆಳಕು ದೇಹಕ್ಕೆ ಲಭಿಸುತ್ತದೆ.
- ಆದಷ್ಟು ಕಿಟಕಿ ಪಕ್ಕವೇ ಕುಳಿತುಕೊಳ್ಳಿ. ಸಾಧ್ಯವಾದಷ್ಟೂ ಕಿಟಕಿಯ ಗಾಜುಗಳನ್ನು ಪೂರ್ತಿಯಾಗಿ ತೆರೆದಿಟ್ಟುಕೊಳ್ಳಿ. ತಾಜಾ ಗಾಳಿಯು ವಾಂತಿಗೆ ಕಡಿವಾಣ ಹಾಕುತ್ತದೆ. ಮಿದುಳಿನ ಮೇಲೂ ಅಷ್ಟು ಒತ್ತಡ ಉಂಟಾಗದು.
- ಯಾವ ಕಾರಣಕ್ಕೂ ನಿದ್ದೆ ಮಾಡಬೇಡಿ. ಇದರಿಂದ ಪ್ರಯಾಣದ ಸುಸ್ತು ಹೆಚ್ಚುತ್ತದೆ.
- ದೀರ್ಘ ಪ್ರಯಾಣದ ಸಂದರ್ಭದಲ್ಲಿ ಹೆಚ್ಚು ಆಹಾರ ಸೇವಿಸಬೇಡಿ. ಹಸಿವಾದಾಗ ಮಾತ್ರ ತುಸುವೇ ಆಹಾರ ಸೇವಿಸಿ.
- ಪ್ರಯಾಣದ ವೇಳೆ ಚ್ಯೂಯಿಂಗ್ ಗಮ್, ಏಲಕ್ಕಿ, ಲವಂಗ, ಶುಂಠಿ, ನಿಂಬೆಹುಳಿ ಪೆಪ್ಪರ್ ಮಿಂಟ್ ಬಾಯಿಯಲ್ಲಿಟ್ಟುಕೊಳ್ಳಿ. ನಿಂಬೆ ಹಣ್ಣನ್ನು ಕೈಯಲ್ಲಿ ಹಿಡಿದುಕೊಂಡು ಆಗಾಗ ಆಘ್ರಾಣಿಸಿ.
- ಮುಂಗೈಗೆ ಬ್ಯಾಂಡ್ ಕಟ್ಟಿಕೊಳ್ಳುವುದರಿಂದಲೂ ಟ್ರಾವೆಲ್ ಸಿಕ್ನೆಸ್ ಸಮಸ್ಯೆಯಿಂದ ಪಾರಾಗಬಹುದು.
